كلما تذكرته
تبسمت
منذ أن عرفته و هو ضارب الدينا بأسرها عرض الحائط
وُلدنا في ذات السنة و منذ وعيت على الدنيا، انا معه وهو معي
أذكر أول يوم لنا في رياض الأطفال
أتذكره و كأنه يوم أمس
"عفر بالمُدَرِّسة عفرة" في ساحة الروضة!
أكتشف أنهم وضعوه في صف آخر غير صفي
قال والده بفكاهة
"يبه حطوهم مع بعض هذول ..... ......."
كانت أول مرة أسمع بذلك المصطلح إلا تلك الكلمتين لازمتنا لفترة طويلة
أعتقد اننا كنا نمضي 36 ساعة في اليوم معاً
نعم كانت ساعتنا مختلفة
لا أذكر أننا أختلفنا على كثير
وإن أختلفنا تراضينا من دون وسيط
من المواقف المضحكة التي مرت علينا
كنا مع بعض على اسكلة دسمان في بداية السبعينيات
قدر الله له أن ينزلق من قطعة في الأسكلة كانت مكسورة
أصبح نصفه فوق الأسكلة ونصفه الاخر في الماء
كنت لحظة انزلاقه شارد الذهن في زرقة البحر
تفاجئت بإستغاثته ولكن وبسرعة البرق صرخت بإتجاهه
يريور يريور
طبعا لم يكن هناك يريور ولا يحزنون ولكن أردت أن أستغل طرافة الموقف
اخذ المسكين يصرخ ويرفع احد رجليه ويخفضها و يرفع الرجل الأخرى وهكذا وأنا غارق في الضحك إلى أن مددت يدي إليه وأخرجته وهو يسب ويلعن
يشاء الله أن نفترق
لم يكمل دراسته بينما كنت أنتقل من سنة دراسية إلى أخرى بسهولة
استلم وظيفة بسيطة في الوقت الذي غادرت به لإكمال دراستي العليا في الخارج
رأيته منذ مدة بسيطة
سبحان الله
لم يتغير!
ولكن يا للأسف
هناك 34 تعليقًا:
الله يعطيك الصحة والعافية ويطول بعمرك
بس
بداية السبعينيات؟
غير اسمك الى
.
.
شيـــــــــــــبة الديرة
لوول
:*
ماشاء الله عليه... العمر كله لك ولطبجتك
:)
اللي ما يتغير شكلهم قلوبهم باردة ويكونون ضاربين الدنيا بستين يمني
الدراسة بعد البكالريوس تسبب تجاعيد(كل عاقدين النونة ومبوزين).. وتشيب الراس وتييب الصلع الغير وراثي وتسبب انتفاخ بالبطن (كرش متربي عالغالي... على قولة المرحوم فؤاد المهندس)!
هالاسكلة وايد تحتها درادير (تيارات مائية)!!! كانت ومازالت تخروعتي!
أحب هذي النوعية من البوستات:)
وتتذكر الروضه كأنه امس؟
ما شاء الله تبااااارك الرحمن
:)
تهقه شنو قال عنك؟
وهل فعلا الدراسه والحياه والتجارب تغير من ملامح شخصياتنا وملامح حتى مشاعرنا؟
وجندوله :
شهالحجي؟
مو خوش بشاره وراي مستقبل
اخرتها بصير جذي؟
:Pp~
بس ماعرفنا المصطلح ليلحين :)
وبعدين الله يهداك .. اغنيه ثلث ساعه لييييييش !!
يا كثر من اللي ما تبين بعيونهم العشره - بكسر العين.
والله ان الدنيا دواره ،،، كلنا نمر على أشخاص ونحسب انه اهو اخو الدنيا
مع الايام تدور الدنيا نكتشف انه مهو الشخص المناسب
!!!
دنيا،، الله يخلي لنا ربيعنا واخونا الطيبين السنعين!!!
على البوست الاولي اقولك صل على النبي واذكر الله
ماكو الا العافيه!!!
لو انت رفيج عمري
أجلب فيك و ما هدك
صداقة العمر شيء ما يتعوض
من بعد "ازنك" ولد الديرة
استكانة:
الدراسة تكدش الرياييل بس
:)))
الله يوفقج وان شاءالله دوم "جريـــن"
:)
العرزالــــــه
يعافيك ويخليك يا الحبيب
لول
يا موعد كانت ايامنا اسود وابيض بس البحر اللي كان يبين ازرق :)
لا و خابط شوي :q
chandal/danchal!!
الله يحفظج ويخليج ويحفظ الغالين اللي حواليج
سبحان الله في خلقه
بس انا ما كرشت ترى :>
يا معودة هي درادير
هي طينة
مكان غريب عجيب
لكن عندنا ذكريات غير طبيعية هناك
لحظة ابجي شوي وارجع :)
esTeKaNa
احبج الله فيما احببتي البوست فيه :)
تصدقين اذكر شغلتين بالروضة
هالموقف الغريب
و اذكر ابلة كانت تسأل اسألة اغرب
منها
ابوك غني والا فقير!
وانتي شكوووووووو :q
الدراسة العليا ترى حالها حال الدراسة السفلى والدراسة الوسطى
(حشى مناطق السعودية مو مراحل دراسية!)
اللي ينظم وقته تقزر عليه ويستفيد
كلش كلش يروح القاهرة والا الأردن :>
الحمد لله والشكر
روحي يا استكانة يا بنت ام استكانة عسى التوفيج فالج بدون دهان سير حق الدكاترة :)
Q80 Blogger
Two you know what in one underware
:>
مو الإغنية الحين!
اللي يصفق ما لج اهل بيت يرانكم؟
حسام بن ضرار
ليس كل ما يلمع ذهباً
يمكن رايح الحلاق ومنعِّم وملحفه بتقشير
ARTFUL
اللهم صلي وسلم عليه وعلى آله وصحبه وسلم
فعلاً الدنيا دوارة
سابقاً كانت اروح مع والدي رحمة الله عليه إلى السوق
يمرون عليه اشخاص يسلمون عليه بحرارة ويرد عليهم بشوق و مودة و يتكلمون دقائق ومن ثم يفترقون
اقول له وانا يمكن عمري كان 6 7 سنين
يبه منو "هذولا"
يقول لي ربعي من زمان ما شفتهم
في ذاك الوقت ما كنت افهم ليش ما يشوفهم!
تالي عرفت و تحسفت اني كبرت :)
بن جبلة
كلامك صحيح
لكن الحياة قطار
يا كثر المحطات اللي تمر عليها
و ساعات توقف فيها
لكن بالنهاية تمشي
chandal/danchal!!
you have your ears :)
الزميل ولد الديرة
لا تندم على ما فات
القلب سموه قلب لأنه يقلب
فما حالك ببن أدم
وايد من ايام الفترة اللي تكلمت عنها جميله خصوصا لمن من يعاصرها طقت اللي مصغر عمره العرزاله
على مأظن كانت الناس على السجية
و لا كان في هالبهرجة اللي بالحياة تصدق و تأمن بالله لو اقولك منو ربعي بهالفترة بتنصدم
6 عيم شيعه و 2 عيم سنه و 4 بدو و 5 حضر و اثنين بدون ما ندري انهم بدون من اصل عراقي و ما ندري انهم بدون لأن امهم كويتية و اثنين سعوديين مواليد الكويت تكفى شوف التركيبة
بذمتك تقدر تلاقي هالتركيبة بديوانية ماني قايل ربع
Enter-Q8
مساك الله بالخير يا الحبيب
انا كلش مو نادم على اللي فات :)
ذكريات جميلة ما اظن ان الأطفال او حتى الشباب الان عندهم نصف هذه الذكريات
كلام صحيح
الحياة تتعقد والسياسة تعقد اللي ما يتعقد
مصائب و ذكريات
عنوان كتابي القادم :)
دعائك بالوقت المناسب
وردك خله الكشرة من هي لي الخفجي:)
يزاك الله كل خير يا ولد الديرة
عسى ربي يفرحك ويسعد قلبك قول امين
شلون اغلبتكم الدنيا وافترقتاو ضاق خلقى بالنهايه ..
ويا سلام على ريانه العود
خوش اختيار
:)
الاصاله اخوي
سؤال دوم على بالي !
هل الماضي اهو كان حلو
ولا العمر هذاك له حلاته غير (=
صير مثلى و بكل حقبة من حياتك بدل ربعك
احسن لك
والا بالله عليك واحد معاك من صغر خلاص ماكو شئ يضيفه الى حياتك غير الحنه و الرنه و الشكاوى
بعدين يمكن لان ما سافر ولا كمل دراسته و ظل محصور بنطاق ضيق
ما عنده شئ يقوله
اهم شئ انك تتذكر الايام الحلوه
عمممممممممممممممري الي ضيعتواااااااااااا زمااااااااااااان بعيونك السود
سبحااااااان الله الدنيااااااااا تركض
والاحوال اتبدل
وناااس تشوفهم و يروحون و بعد لقياهم يشغلون بالك جم يوم و انت تفكر فيهم
يمكن حس بان الدنياااااا ماعطته شي
وضاق خلقه ليش انت كملت و يمكن مو غيره بس شي حز بخاطره
او يمكن يقول بقلبه اشلون كان هذا رفييييييجي
ويه بسي وانا افكر بشنو يفكر
ياااااااابا انت اياااااا مواااااااليييييييييييد؟؟؟؟
لك طوله العمر
هذاك اليوم وديت اليهال بحر شويخ
جان اقولهم قبل ايااام يدي اشلون كنا نطلع من شويخ و نعبر و نروح لي بحر شويخ
نحضر الشروق ويا يدي و اذا طلعت الشمس ودانااااا مخبز الشاميه تشتري زعنر و سانكست و انتريق وانااااااام
فجأه و اذا بحموود الصغير يقولي
اوووووووووووولا انتي عيوووووووووزه
:/
دنيا المودة النقيه عجيبة من عجائب الدنيا السبع ، أدام الله لك هذي النعمه
ورد الجميل لك من نصفك الثاني
استحضرني المقولة الشهيرة للعلامة نعيمة الصغير ..
تفوقس عالزمن ..
من يمتلك الذكريات الجميلة .. لا اعتقد سيندم على حاضر .. لانه عاش ماض جميل ..
اشرايك فيني لوول :) ..
والله اشتقت للتعليق في مدونتك يا صديق :)
esTeKaNa
آمين يا رب العالمين
على فكرة منيه لي الخفجي مو بعيد خاصة لا صار الواحد بالخيران :>
charisma
شفتي شلون
الحين عرفت اني شيبت :)
مركبنا
هلا اخيتي
اظن الماضي دائما يكون ابسط بالمقارنة مع الحاضر
البساطة بالنسبة لي و ربما لك ولكثيرين تعني السعادة وراحة البال
هذا كان واقعي على اي حال :)
السلام عليكم
العشرة الحلوه اتخلي الواحد ينسى كل غلطة يرتكبها الطرف الثاني لان القلوب صافية
كفاية اذا شفته يفهمك على طول حتى لو اتطول عنه بالغيبة
الله يجمعكم على الخير
براقش
هقوتي خلقة الواحد يكون عنده ربع جدد في كل مرحلة زمنية في حياته
هذا اللي ما كنت فاهمة لما كنت صغير
وصلت مرحلة ما اقدر انسق بين مجاميع من الأهل والمعارف
هذي مجموعة طرطنقية بس مساكين خوش اوادم
هذي مجموعة اقتصادية بس يضيقون الخلق ما عندهم الا اخضر احمر
هذي مجموعة جزاك الله خير و عشا كل خميس
وغيرهم وايد
صاحبي هذا من سذاجتي اعتقدت ان حياتنا معاً لن تتغير وسنكون مع بعض على الدوام
بينت لي الدنيا ان هذا طل بعيني :)
بالمناسبة هو فعلا ما عنده شيء يقوله لكن ضحكته ما تغيرت من 45 سنة
lawyer
تصدقين ضاق خلقي!
عمري ما فكرت ان شيء طبيعي سويته في حياتي ممكن يضايق اي صديق!
خذي الحكمة من افواه اليهال
خو انتي لا تطرين لهم اي شايب والا عيوز
كله قولي لهم انج بالمتوسطة :)
mowa6en
الله يسلمك ويخليك ويحفظ لك ما عندك
شرفت :)
بوتشخيص
هلا بالطيب الغالي :)
رايي فيك كان ولا يزال لم يتغير وسألنا عنك لا تقول ما فينا خير :)
بس علمني
شهالواسطة يا راجل :>
http://www.aljareeda.com/aljarida/Article.aspx?id=112799
someone_q8
وعليكم السلام ورحمة الله وبركاته
الله يسلمك
عمرك شفت ماضي يرجع :)
خلاص
الذكرى تبقى ذكرى
سلمك الله وحفظ لك كل عزيز عليك
إرسال تعليق