مضى ثاني يوم من رمضان علي بدون أحساس لا بجوع ولا بعطش
الوقت مضى بسرعة حيث أمضيت الصباح إلى العصر في زيارة بعض الأقارب والأصدقاء والمعارف في مكاتبهم
تحلطم بعضهم زاد عن حدة فيما يتعلق بالتعب من الصيام وانا اتحلطم بيني وبين نفسي واقول "اخاف داق شبل الحبيب"
أمر بالشوارع فأرى بعض المساكين من العمال الذين يعملون تحت الشمس الحارقة فأتذكر بعض اولئك المتحلطمين واتمنى لو أن تتبدل احوال هؤلاء المساكين ليعملوا في المساء بدلاً من النهار، كان الله بعونهم وبعون وزارة الشئون الإجتماعية والعمل التايهة
أقرأ عقب العصر ما تيسر لي من القرآن و ينقز جعدتي ويجلس بحضني
"يبه ابي اقرأ قرآن معاك"
المصيبة أني أقرأ في سورة آل عمران وهو يقرأ سورة الإخلاص وبصوت عال! شوش على كلفات أمي إلى أن انتزعته البعلة من أحضاني وكشته خارجاً
سريعاً تمضي الدقائق إلى أن حان موعد الإفطار
عادتي أن أفطر افطار خفيف وأذهب لصلاة المغرب بالمسجد ومن ثم افطر فطور اوادم
"إم فينا!" يقترح مضيفي
افتشلت منه
أقمنا الصلاة ببيته وانا أتحلطم بيني وبين نفسي "لو كل عشرة صلوا بروحهم جان ماكو مسايد"
اصكهم بسورة ابراهيم الحين!
بلعت العافية وقرأت سورتي الكوثر والإخلاص مالت ولدي خفت ما يفطروني
عقب الفطور ما ادري شلون بالغلط شفت حلقة بو قتادة وبو نبيل
حلقة مليقة و متطنزين على الخوال وحاطين شخصية يعني تكون شخصية د. أحمد الخطيب
أنا وايد انتقدت الخطيب لكن تراه فعلا رمز وطني غصبٍ عليكم
ودي أعرف شغلة
ليش كثير من ائمة المساجد يختمون القرآن في التراويح؟ شخليتوا حق القيام؟
الجو رطب والناس يالله خير تارسين المسايد و من تقرته الناس حبته تعرف شمتفطرين من اول تقرة
خفوا على الناس!
بدء مشوار الزيارات في العاشرة مساءاً
تنوي الجلوس عند اناس ما عشر دقائق فتكتشف متأخراً أنك جلست لمدة ساعة
عصير ماي جاي قهوة بيذان فيمتو
أحد الأخوان حاط غريْبة! ليش يا اخي!! غريْبة بهالرطوبة؟ شنو تعذيب
يمسكني احد الأقرباء المثقفين بهالفريج عند السيارة بهالرطوبة نص ساعة عقب الساعة اللي تكلمنا فيها داخل، ويكمل حديثه على موضوع فقهي! تمنيت ان أكون ياباني للحظة لأني ما أظن عمرهم تناقشوا مع بعض فقهياً
الزحمة بالشوارع شيء غريب
شصاير؟
صارت شوارعنا غابة
فكروا لنا بسالفة مثل خلق الله اللي بماليزيا وغيرها اللي حطوا افكار جميلة للنقل الجماعي و تحققت
ترى مهي حالة الدرب بين الشامية والعديلية ياخذ ساعة ونيف
-------------
الكايين S والا ستة سلندر؟
راحت بيزاتك على الهبني
هناك 24 تعليقًا:
كل عام وانت بخير
ربي يخلي لك الجعده
والفال لما يحفظ القران كله (=
اي والله يعورون القلب هل العمال والحمد لله على كل حال
الحمد لله اجازة في رمضان
وهيعه في البيت وتقليل احتكاك مع الناس (=
حقا بالنسبة لي رمضان ثاني لاول مره اشعر فيه (=
----
مريت اليوم وحدة مسويه حادث بالمستشفي وقاعده على النت قلت لها وسعي صدرج بهل مدونة (= استانست
بارك لك الله فيها يا خوي
مبارك عليك الشهر
و احي فيك تفضيلك لجماعة المسجد على جماعة البيت
ناس وايد مالهم خلق يروحون المسجد عقب الفطور و زين ما يصلون فوق السماط
صبحك الله بالخير
سبحان الله رمضان بركة،وربي يعطي على الضعف قوة،والنهار يمشي،بس مادري من داومت الناس محذفه ملفاتها بصوب والبوز بصوب والعسارة شي ما حصلش
:P~
ولد الديرة
دمعت عيني على جعدتك يا حلاته
رجاء رجاء رجاء حار لا تدقره
باجر يحفظ القرآن ويلبسك تاج الوقار وتفرح به ان شاء الله إمام بالمسجد قول آمين
:))
هالبوستات خفيفه وتونس
بس انا عجبتني ونيف
نيف
!!
تم تخزين الكلمه باستخدمها بمناسبات أخرى
:P
انا كرهت صاحبك اللي ما لقى يسولف الا عند الباب
D;
الحمدالله رمضان خفيف ربي لك الحمد :)
وعلى الختم بصلاة التراويح انا اقول مافيها شي والحمدالله عندنا تنويع خطييير
تبي تختم القرآن بعشرين ركعه موجود تبي تصلي عشرين بنظام الركعة الثانية قل هو الله أحد موجود
تبي من أذان العشاء الى تسليمة الشفع والوتر نص ساعه موجود
تبي ثمان معتدلين موجود تبي ثمان ينام بمردانك ويهد حيلك هم موجود
وكل يروح المكان اللي يسره
:)
LOL
الله يرحمك يا شيخ علي الجسار
بعد الفاتحة يقول قل هو الله احد ويكبر
صلاة المغرب عنده... اسرع من صلاة البيت
مبارك عليك الشهر
الله يسلكم الأئمة - بما إنك مشروع إمام - يختمون بالتروايح لسببين، الأول علشان بالجيام يخلصون كل يوم ثلاثة أجزاء، وتصير الختمة برمضان ختمتين، والثاني لأن في ناس تروح التراويح وما تروح الجيام، فمو من اللائق يقرا الإمام على راحته طول الشهر، واللي ما يصلي الجيام معاه ما يصيد الختمة
وبعدين عجبتني سالفة ساعة نيف
ارجل مسيد في العالم
ضاحية عبدالله السالم قطعة 4
الساعة 8 وعشر خالص تراويح
اهم شي و نيف
انا بعرف هالملايين اللي يصرفونها على المحترفيين شنو بالمقابل اللي قاعد يدخل للنادي
السلام عليكم
مبارك عليك الشهر :)
كثر من هالرمضانيات ياصاحبي ... لاهنت
هلا ولد الديره الغالي .
عدل كلامك ، كانت الحلقه ثجيله شوي ، و اتمنى من الدكتور ياخذها بروح الانسان الكبير اللي نعرفه ، بروح الدعابه و المرح.
لكن حلقة اليوم ضحكت على هلال الدين و مطالباته اللي مالها والي ، وترى مصخت السالفه
اسقاط قروض و معسرين و عمات عين ، ترى هالسوالف تنم عن جهل و قلة عمل و تعمير بلد .
لي وجهة نظر بزحمة رمضان بعد الفطور .
ترى اشوفها وحده من المظاهر الجميله بجو رمضان العام ، تشعر الناس جميعها فرحانه و لا تتذمر في الشارع و تحس بالتسامح بالطريق ( بس بعد الفطور )
اما الصبح و انت رايح الدوام ، ما راح اقولك النفسيه اشلون صايره ، انت ادرى
لكن ما فيه ملامه ، طوف الوضع طبيعي .
مبارك عليكم الشهر
من يوم وانا ياهل هالعمال يعورون اقصى قلبى
شلون متحملين هالبقة..وصيام؟؟
حطيت هريس..بالاستفتاء
ما آكل يريش:P
عندنا وحده تخصص سوالف ع الباب
لى سيرنا عليهانقص من التسيورة
النفط مقابل الغذاء
ورانا وقفة اشطولها عند الباب
مركبنا
وأنتم بألف خير يا رب ويخلي لك أحبابك
الله يشافي مرضاكم ومرضى المسلمين ومرضى العالم اخاف يقولون ليش انتوا ما تحبون الخير للإنسانية جمعاء :>
رمضان خير وبركة والله اني امس مهايل بالشموس حتى عطش ما عطشت
حافظك الله
حسام بن ضرار
هلا بالحبيب
ما ادري هالناس شوراهم
المنطق مفقود
الله يهدينا ويهديهم قول آمين
esTeKaNa
مساج الله بالخيرات
الله يهدي هالناس ذلوا العالم بصيامهم ما صار صيام
مال معسكر رمضاني بأم العيش من عقب الفجر علشان يعرفون شلون يصومون
يا علج ما تبجين غالي
عاد هذا حبيب ألبي
كلهم يشبهون خوالهم الا الجعدة مسيكين يشبهني فلهذا كاسر خاطري :q
كل يوم عندنا حجوة من طقة نيف :>
نتمنى لكم صوماً متقبلاً وافطاراً شهياً
ARTFUL
تصدق صاحبنا هذا اديب ولطيف بس الله يهديه مضاد للأحوال الجوية
والله انا معاك فعلا التنويع خطير لكن مصيبتي اني طايح بمسايد كلها تختم والجو انت خابر ما يساعد وفيه ناس لازم تدوس على اصابع ريلك والا ما تقدر تصلي
تعال فجج عاد :)
chandal/danchal!!
الله يرحمه
مرة من المرات واظن برمضان
رايح بيت جيراننا ولدهم رفيجي
هذا الكلام يمكن من اربعين سنة او شيء جذيه
توني واصل عند الباب والا هو طالع من البيت (زاير الديوانية)
جان اقول له فلان هنيه
رد وقال اي شوفه داخل
انا ما عندي سالفة اللي سائلة وهو مو من اهل البيت
وهو الله يرحمه ماكو شغل يرد وهو ما يدري عن هالصبي
Fahad Al Askr
هلاو، علينا وعليك وتقبل الله منا ومنكم صالح الأعمال
والله كلامك صحيح فعلا منطق
لكن مثل ما قلت حق اخوي آرتفول ماني قادر بهالجو على الختمة وكل مسيد طبيته يختم الا امس خوش شيء
اشوه دار شمال
لا تقاطع :)
BeeDoO
ذكرتني بالشيخ وليد الدليمي
كان يصلي ونصلي معاه لو يطول ما نحس
نجرب ليش لا :)
Enter-Q8
تصدق!
انا وياك على طول الخط
راحت بيزات المرحوم على فراسوه وغيره
من زين الدوري من زين الملاعب من زين الجمهور من زين الجو من زين العصير اللي ينباع بالمبارة من طقة سن توب اللي يسحن الجبد
شنو اللي ثلاث ملايين !
Hussain
وعليكم السلام ورحمة الله وبركاته
علينا وعليك يا الحبيب و حاضرين للطيبين :)
عاضّه
هلا بالغالي
ما اظن الدكتور درى عنهم
والله مطوفين يعلم الله
انا اسوق الموتر بطريقة دفاعية صباحا ومساءا يعني بعد الله سبحانه اتحسب مثلا لأي مخرج طالعة من سيارة لأني ادري انه بينام علي وغيرها من المواقف اللي مطنشها بمزاجي على قولتهم
بس ترى الزحمة غير طبيعية مو معقول نستمر بهالشكل لياسن لكل من هب ودب والشوارع هي هي ما تتغير
المقوع الشرقي
اهلين وسهلين وعلينا وعليج
والله الأثنين شغل عدل لا صار طبخهم مضبوط
عني انا احب اليريش اكثر لأن بصراحة اغلب الناس ما تعرف تسوي الهريس
عليكم بألف عافية
المقوع الشرقي
يعني لو بالشتا ناكل هوا ونتحمل
الرطوبة ذاك اليوم يمكن 80% اللي بغيت اقط غترتي وعقالي ما بغيت الا روحي
نحتاج مختصر صغير مكيف يم الباب لسوالف الباب
إرسال تعليق